Howgmanay - Here Ah Come. by Achawa c. 1953
Howgmanay – Here Ah Come !
By Achawa c. 1953
'E first hoose sees ye as ye are,
A happy, carefree blok;
'E second finds ye loosenan up
An' laughan lek til chok.
'E third is where ye start til sing
An' tell yir funny story;
'E fourth is where ye go from 'Trees'
Til 'Land o' Hope an' Glory.'
'E fifth – if ye still can coont
Is where ye stan 'e test,
'At many fowk come in an' oot
Id's lek 'e Home o Rest.
'E sixth is no so bad somehow -
Bit id's no' for long – iss lull
'E seventh sees ye off again
An' roaran lek a bull.
'E eighth is where ye should hev sense
An' make yir tracks for bed;
Bit fa hes sense on Howgmanay
When 'e wine is really red.
So ye wid try wan ower 'e eight
Wan for 'e rod, ye sey'd
Bit ats 'e wan 'at broke yir back
An' – faigs – near broke yir heyd.
Id's funny though, how wi' id all,
'E seekness an 'e pain.
When Nineteen Fifty Fower comes roon,
Ye'll be at id – same again !'
