The Wally Dug

[Lavenderblue2]

The Wally Dug

I aye mind o' that wee hoose that stood on the brae,
Its lum was aye reekin', its roof made o' stray.
The ootside was bonny, the inside was snug,
But whit I mind best o' was the wee wally dug.

It stood in a corner, high up on the shelf,
And keepit an ee on the best o' the delf.
It was washed twice a year, frae its tail tae its lug,
And pit back on the shelf, was the wee wally dug,.

When oor John got mairrit tae sweet Jeannie Blue,
The auld folks they gied him a horse an' a coo,
But when I left the hoose, ma hert gied a tug,
For a' mither gied me was the wee wally dug.

There's an auld saying, 'Ne'er look a gift horse in the moo',
But I looked that wee dug frae its tail tae its broo'
An' a fun' a wee slit at the back o' its lug,
It was stuffed fu' o' notes, was the wee wally dug.

I tain it hame tae oor Lizzle tae pit on a shelf,
An' I telt her the worth o' that wee bit o' delf.
An' we aye feed it yet through that hole in its lug,
It's a guid bit o' stuff, is the wee wally dug.

Anonymous

[cuddlepop]

And here's another.

Oor Granny had twa wally dugs upon her lobby table.
She dusted them maist every day as lang as she wis able.
Bit then ,when Granny passed awa' ,oor Maw wis systematic.
And pit them in a cardboard box and shoved them up the attic.
They lay wi' Granny's bits an' bobs an' things that she did treasure.
A' wrapped in paper an' sich like ,jist as a safety measure.

The dugs lay there near sixty year, syne Mither passed awa'.
As son and heir they fell tae' me, I thocht that they were braw.
I brocht them doon an' set them up upon a fancy dresser.
I showed them tae' my ain guid wife, wha' ca'd in the assessor.
We're keepin' Granny's wally dugs, this attitude is healthy.
Bit when we sel't her bits an' bobs they made us raither wealthy.
The End